Azərbaycan
Ana yurdun intibahı ürəyimə fərəh verir,
Gündən-günə cilalanır, büllurlaşır Azərbaycan.
Zəfər yüklü uğurları hər gedişdə təsdiqlənir,
Yetkinləşir, samballaşır, qürurlaşır Azərbaycan.
***************************************
Çalxalanan dünyamızda dövlətimin yeri bəlli,
Gələcəyi uğurludur düşündükcə düz əməlli.
Möhtəşəmdir ehtişamı ,qoyulan gündən təməli,
Bu səbəbdən ümmanlaşır, aşıb-daşır Azərbaycan.
****************************************
Şəhərlərə köç etdikcə dağlarının əzəməti,
Göz oxşayır ruh ovudur sarayların təravəti.
Durulaşıb paklaşdıqca insanların təbiəti,
Başdan-başa təzələnir, cavanlaşır Azərbaycan.
****************************************
Qapıları taybataydır, xoş məramla gələnlərə,
Nemətini əsirgəmir qədir-qiymət bilənlərə.
İsti ana qucağıdır öz yerini bilsə hərə,
Bu xislətlə dünyamıza çox yaraşır Azərbaycan.
***************************************
Neçə məqam yollarının kəsişində bərqərardır,
Tale yüklü çözümlərdə xoş məramlı yeri vardır,
Düşməninə göz dağı tək millətinə iftixardır,
Bu minvalla pisliklərdən uzaqlaşır Azərbaycan.
****************************************
Övladına od bəxş edər atəş dolu varlığından,
Ürək coşub vəcdə gəlir yurdun bəxtiyarlığından,
Hər nəfəri şairləşir çıxıb sənətkarlığından,
Ucaların məqamında ucalaşır Azərbaycan.
**********************************
Nəyimiz var bu dünyada, bu sevimli yurddan savay,
Çox şükür, bu cənnət diyar olub bizə taledən pay.
Təbiəti sığal çəkir ruhumuza, çalır lay-lay,
Babalaşır, atalaşır, analaşır Azərbaycan.
Açar sözlər:
Ya da başqasına könül açıram.
Xəyalımda sənsizliyə uçuram
Dünya fənalığın tərk edən deyil,
Səni mənsizliyə öyrədirəm, bil.
Bəzən xəyal uçub gedir gəncliyə,
Az qalır ki, xitam verə dincliyə.
Ötənlər beynimdə canlansın deyə
Dönürəm qəvvasa mən dili qafil,
Səni mənsizliyə öyrədirəm, bil.
Gənclik çağlarıydı, həyat firavan,
Coşub çağlayırdı damarlarda qan.
Sevib seçdik bir-birini o zaman
O vaxtdan ötüşür otuz yeddi il,
Otuz altı vur dörd 144 fəsil.
Yaşadıq, yaratdıq ürəyimizdə,
Çiçək açdı arzu, diləyimiz də.
Balalar yetişdi köməyimizə
Bir təzə qələbə gətirdi hər il,
Sevincdən gətirdi yetişən nəsil.
Tək yaşamağımda məqsədim bəlli,
Qalan ömür olsun sənə təsəlli.
Başqa gümanlara düşmə ay dəli
Fikrim xam xəyala uyan ha deyil,
Səni mənsizliyə öyrədirəm, bil.
Tanrı bəxşişidir yaşanan hər gün,
Həsr et nəvələrə uzansın ömrüm.
Mən də o mənəm ki, elə gördüyüm
Halım, xasiyyətim dəyişən deyil,
Səni mənsizliyə öyrədirəm, bil.
Qismət olsa bir vaxt gələrəm mən də,
Çıxıb təqaüdə dönərəm kəndə.
Əlvida söyləyib vaxtı gələndə
Seçərəm münasib sonuncu mənzil,
Səni mənsizliyə öyrədirəm, bil.
- Şeirlər (19)
- Hekayələr (0)
- Məsnəvilər (1)
- Rəvayətlər (0)
- Qəzəllər (2)
- Xəbərlər (1)
- Avqust 2008 (1)
- May 2008 (10)
- Aprel 2008 (13)
